洪為民絕食撐國教捱轟

【明報專訊】國民教育科成為全城話題之際，菁英會榮譽主席、全國青聯委員洪為民（Witman），噚日清晨在facebook上留言，話「忽發奇想」要在9月12日青聯會慶日絕食支持國教，諗住可以「順便減肥，又可以避開應酬」，仲號召「兄弟接力」。佢有一個叫Raymond嘅朋友，接力留言話可以佔領會展，謔稱要做埋國際媒體頭條。佢哋呢番對話，噚日喺網上廣傳，備受抨擊，有網友叫佢「絕食吧，口講無憑」。


網友﹕絕食吧！

Emily噚日打畀洪為民問呢件事，佢承認有寫過呢番留言，至於係咪真係好似學民思潮黃之鋒佢哋咁坐言起行，起初佢就話絕食撐國教科「未有此計劃」，問問吓佢就話「係有考慮」，但如果要絕食，要先搵醫生檢查身體。對於有網友抨擊佢係「人渣」，洪為民批評反國教科人士「霸道」，「同意你就係民主，唔同意就係人渣，係咩邏輯 」。


至於絕食減肥之說，洪為民承認自己或有用語不當，「當一句笑話咁講」。佢話自己身型唔細，因此過去成日留言都係講減肥。不過，將減肥同絕食一併嚟講，佢承認「可能會冒犯一啲人」，但又話佢有不少朋友支持佢嘅留言喎。


至於9萬人上街反國教科，洪為民就話佢支持成立國教科，「唔搞唔係option（選擇）」，重點係點樣教，又話現時政府並無逼學校即刻教。不過，洪為民噚日同電視台記者坦承，佢個囝囝係讀國際學校，咁即係本地學校成立國教科與否，都同佢嘅囝囝無關囉。