匯豐看中對冲基金生意 猛挖大戶經紀

【明報專訊】匯豐見對冲基金生意好賺，都話要玩埋一份，仲四周圍招兵買馬，一口氣就從唔同的金融機構挖來9個大戶經紀（Prime Broker）高層，短時間內籌組咗個強勢班底。


噚日匯豐公布，為咗壯大佢個亞太區股票及經紀服務團隊、提高市場競爭力，請咗9個經紀高層返嚟，主攻對冲基金業務。


九大經紀 陣容鼎盛

話說佢哋個個都大有來頭，有中銀國際、野村證券、高盛、瑞銀、德銀等等嘅前僱員，大部分人來自香港，亦有一啲之前在紐約、台北等地工作過，可謂陣容鼎盛。


匯豐個新聞稿又提到，亞太區經紀服務團隊喺兩年前建立，至今已經成長到40人嘅規模。另外，近年佢亦都加緊擴大亞太區嘅數據分析部。現時歐美經濟麻麻，啲金融機構見匯豐咁忽然咁熱切開拓亞太區市場，唔知會唔會有樣學樣呢？