時富投資用番舊名

【明報專訊】改名先一年幾嘅網融中國（1049），噚日話又要用番個舊名「時富投資」。雖然話好馬不吃回頭草，但小琴想想時富執番老招牌可能都幾心酸，因為呢個反映咗之前大張旗鼓開拓嘅網遊業務，發展得唔理想。公司都話今次要再「積極尋求其他業務投資機會」。


稱再尋求其他投資機會

小琴記得舊年7月時富改名嗰時，公司提出嘅理由，係為咗反映未來大力發展網絡遊戲業務嘅方向。公司又解釋所謂網融，就係「融匯中國的網絡及民眾」，即要同騰訊（0700）分一杯羹，野心唔細。市場上都有唔少人話睇好佢嘅網遊大計，將來業績必定大升。但業績出咗來又係兩回事。網融今年上半年，單是旗下移動互聯網業務就錄得淨虧損2470萬港元，較2011年仲蝕更多。


小琴雖然唔玩網遊，但都知道呢個市場競爭之慘烈。有分析就講，內地網遊市場中有近七成份額係畀騰訊、網易、盛大三個巨頭佔領，其他服務商只可以喺夾縫中生存。


時富今次又用番舊名都算係浪子回頭，公司就響公告中強調番自己係一間「綜合投資企業」，要根據市場同經濟嘅變化「積極尋求其他業務投資機會」，唔知今次又發掘到乜嘢新業務。