大班話煲呔無被軟禁

【明報專訊】前特首曾蔭權近日喺香江可謂銷聲匿迹，Emily近來聽聞，煲呔其實已經遊完加拿大返港，平日喺內地定居，周末返港活動，仲有人話喺過去嘅星期日，喺深灣遊艇會見到煲呔同鄭經翰等一班朋友食飯咁話。Emily噚日見到大班，問起佢呢件事，佢就話「有人見到咩？」被問起有傳言話煲呔「被軟禁」不能返港一事，大班就話﹕「係軟禁，就無理由食到飯啦！」


請肥佬黎上節目互窒

近來大班嘅DBC電台，經常介乎繼續經營同執笠之間，噚日大班就罕有地請咗壹傳媒老闆黎智英出席佢《風波裏的茶杯》節目，3小時節目中，肥佬黎到咗兩個鐘，講吓立法會選情同反國教科等，同埋澄清佢冇資助反國教科學生。


由於過去常有二人不和嘅傳聞，噚日兩人同場開咪都有「互窒」，大班叫對方做肥佬或Jimmy。


兩人話未來會有合作，肥佬黎會畀大班電台嘅節目喺佢轄下嘅報章網絡播放，但兩人又強調無錢銀交往，關係真係若即若離嘞。