工聯會力撐「獨立」林智遠

【明報專訊】獲得發展局長陳茂波「欽點」參選會計界嘅林智遠，一直堅持係獨立人士，仲話自己畀人標籤建制派，感到好無奈。不過，有會計界選民最近收到工聯會會長鄭耀棠推薦林智遠嘅呼籲信，唔少會計界選民笑言，自己唔係勞工界，真係發夢都冇諗過有幸收到棠哥嘅信。


棠哥寫推薦信拉票

不過，最弔詭嘅係，呢封信由候選人自行印製，但經工聯會文職及專業人員總會寄出，只印700份，意味唔係個個業界選民都收到。有選民質疑，點解林智遠唔喺自己嘅競選單張中話棠哥支持，反而要經工聯會網絡向部分選民發信；亦有人話，自己因參加過文專總會嘅課程成為會員，擔心自己嘅聯絡資料，被工聯會攞嚟做選舉用途咁話。


Emily覺得，打住建制派或者民主派旗幟參選都無問題，但唔該講清楚。Emily噚晚聯絡唔到林智遠回應；會計界參選人仲有梁繼昌、陳普芬、黃宏泰。