深圳騰訊總部爆「詐彈」

【明報專訊】呢排唔知發生咩事，內地「詐彈」事件一籮籮，繼幾日前深航一班飛機畀人虛報有炸彈之後，前兩日網上又傳出騰訊控股（0700）深圳總部嘅騰訊大廈亦受到炸彈威脅，不過騰訊發言人就同小琴講，成件事其實只係一場誤會，大家亦都唔使咁緊張。


話說大前晚，微博度有人話騰訊一幢辦公大樓收到炸彈威脅，現場聚集咗警察同保安，大廈入面啲人要撤離，同時亦需要經過嚴格檢查，成幢大廈實行「有出冇入」。之後網上傳言四起，有人話炸彈係放響騰訊大廈，亦有人話其實係騰訊大廈旁邊嘅大族激光大廈；亦都有傳炸彈事件起因係騰訊某業務平台出現分佣金問題，亦有話係大族激光科技公司畀用戶威脅。


公司澄清﹕鄰廈小火警

不過咁，當地公安部門已經證實所謂炸彈威脅其實只係虛驚一場嘅「詐彈」事件，而相關大廈已經一切正常，公安會按程序做調查工作。而騰訊發言人亦都同小琴作進一步解釋，佢話早幾日騰訊大廈旁邊嘅大族激光大廈其實只係發生咗一場小火警，騰訊有部門係響嗰間大廈辦公，但唔知點解件事會愈傳愈混亂，搞到變成「騰訊大廈有炸彈」。既然係咁，小琴都響呢度幫佢同各位讀者澄清番件事啦。


email:piano@mingpao.com