CY愛將轉撈私人工

【明報專訊】梁振英仲未正式上任做特首時，喺候任辦有3位愛將幫佢手，正當人人以為3人大有機會喺政府重聚之際，原來佢哋早已四散。繼專責公關嘅前亞視主播洪綺敏投靠私人企業後，畢業後就做CY貼身助理嘅馮英倫亦決定閃人。


馮英倫跟咗CY好多年，專責政策研究，外界預計CY做咗特首後，馮英倫必能喺政府搵到一官半職。馮英倫承認，自己確實有投考政治助理，但等咗好耐都冇消息，「咁我都要做住嘢先㗎」。


佢話唔方便透露做邊間企業，淨係肯講係做私人助理。咁如果政府肯請佢做政助，到時肯唔肯回巢呢？佢就好無奈咁話唔知。


另外，據聞另外一位候任辦特別助理、「共青團之女」陳冉亦都離開咗CY，另謀高就。唔通大家都覺得政府呢排風風雨雨，冇信心加入呢個熱廚房？