人力網內地通行無阻

【明報專訊】內地嘅網絡長城出名牢不可破，被內地視為眼中釘嘅泛民主派網頁當然無法攻入。不過，竟然有人喺北京成功瀏覽「人民力量」網頁，連結速度仲嫓美民建聯網頁，網友都嘖嘖稱奇，驚歎人力連共產黨都可以感動到。


民主黨社民連冇得用

做呢個測試嘅係學聯前秘書長馮家強，喺佢上載嘅測試片段可以睇到，即使熄咗「翻牆」程式，唔使一秒就已經入到人民力量網站。民主黨同社民連嘅網址就顯示「這個網頁無法使用」，佢話公民黨嘅情况亦類近。唯一突破到嘅喺工黨，不過就load咗好耐同好慢，佢估計同工黨網站面世無耐有關。建制派嘅成績又點呢？民建聯、自由黨同新民黨嘅網頁完全暢通無阻。


馮家強同Emily講，自己一向慣咗「翻牆」，所以無特別留意邊啲網入得唔入得。但前日喺茶餐廳睇報紙時忽然諗到﹕內地一向只能夠睇到某幾份報紙，於是決定睇吓網站又點。佢測試嘅地方係北京南三里屯路一間酒店，喺正陳光誠住過嘅朝陽醫院對面，憑地段都知道嗰度有幾「敏感」啦。馮家強覺得內地對網絡一向嚴密監控，網站入唔入到，多少睇到政府對該組織嘅包容態度。


人力：網站好多反共聲明

人民力量主席劉嘉鴻話，內地係咪放寬佢哋個網站，唔係佢哋嘅責任，佢哋一向反對內地對互聯網設限。佢又話個網好多聲明都譴責共產黨政權，仲話會試吓上載多啲有關李旺陽嘅內容。


參選立法會名單見另文