李君豪張華峯短訊互轟

【明報專訊】金融服務界兩大熱門候選人李君豪同張華峯本來係君子之爭，但噚日出現有人發短訊互轟。觸發點係噚日行內流傳一個匿名短訊，「請不要投票給誠信破產的3號張華峯」；張知道後好嬲，廣發短訊譴責呢個「卑鄙行為」。李君豪一方話有發過短訊畀業界，但無話過張誠信破產，所以好想查吓邊個加鹽加醋，煽風點火。


張華峯：低劣手法攻擊

李君豪：無講過誠信破產

小圈子選舉原本風平浪靜，業界都估唔到近幾日打真軍。觸發點係張華峯接受《明報》訪問同埋喺選舉論壇上，指身兼港交所董事李君豪，曾喺董事局投票支持將股票經紀食飯時間由個半鐘減到1個鐘。李君豪噚日向業界發署名短訊話要再次澄清，指張公開誣衊，「本人特此嚴正聲明：根據22/11/10會議紀錄，本人是投反對票的。本人對張先生的不實言論和不君子行為表示遺憾」、「請各位在投票時，認真考慮各候選人的操守和誠信」。


但過咗一陣，業界就收到匿名短訊，話「請不要投票給誠信破產的3號張華峰」，李君豪助手話只係發過一條短訊，無講過對手「誠信破產」。


張華峯見到「誠信破產」氣難下，即發短訊攻勢，指有人「低劣手法攻擊」，「內容涉及誹謗成分」，話要向選管會投訴。其他候選人仲有林德明、甄文星、鄧予立。