沙田雞粥職員過海撐李慧琼

【明報專訊】Emily噚日喺灣仔行街，離遠見到幾個著住「沙田強記雞粥」紅色制服嘅職員喺度派傳單。正當Emily諗緊點解沙田雞粥都要過海宣傳之際，睇真啲，原來佢哋唔係sell緊雞粥，而係sell緊民建聯李慧琼。咁都得？


嗰幾個職員見到記者都顯得好抗拒，喺呢個時候，有民建聯人員即時到場解圍，話呢幾位仁兄係民建聯義工，想佢哋整齊啲先請佢哋著餐廳制服啫。咁何解雞粥會同李慧琼扯上關係呢？嗰位民建聯義工就耍手話唔知喇。查實嗰幾個雞粥職員嘅制服上，除咗印有餐廳名外，仲寫有「正東」兩字。Emily上網查過，發現一個正東柔道會，曾經同民建聯荃灣支部一齊搞過活動。唔知兩者有無關呢？