李君豪拉票百發百中

【明報專訊】選舉落幕總係有人歡喜有人愁，港交所（0388）獨立非執行董事李君豪，雖然輸咗個馬鼻畀老行尊恒豐證券老闆張華峯，不過李都好有風度，話好高興喺競選過程中，集合到大、中、細經紀行，當中有外資有華資行一班行家認同佢嘅理念，凝聚到業界嘅聲音咁話。


小琴恭喜李君豪初試啼聲就攞到咁好成績，唔少經紀都話如果李君豪多啲時間準備，可能會贏都唔定，話晒兩個主要對手只差6票！李君豪就爆料，話其實應該只差5票，因為有1票有選民用筆剔咗佢個冧把，而唔係用大會提供嘅印章，因此成為廢票。


有選民用筆劃 平白損一票

李君豪又話自知講關係唔夠對手撼，主要係sell理念，賽前用咗接近兩個禮拜，洗樓洗咗200間行，每間用大約半個鐘講解佢嘅政綱，結果攞到202票（計埋嗰張廢票係203票），洗樓成效堪稱百發百中，泛民真係應該學吓嘢。不過李君豪都慨嘆，冇時間洗埋餘下300間行，否則選舉結果可能改寫。


小琴問佢，其餘時間花咗喺邊？李君豪就話，宣布參選後，最初主要係揼個政綱，搞好晒先開始見鄉親父老，但期間又有啲「暗器」飛埋嚟要處理，所以最終只係洗到唔夠一半嘅行。


將來續為證券界謀利益

不過，李君豪話努力冇白費，佢同埋一班認同佢理念嘅行家，將來會定期聚會，諗吓點樣幫到證券界。


email:piano@mingpao.com