謝偉俊缺席1/3平機會議

【明報專訊】趁住政府換屆，Emily幫各個政府諮詢委員會嚟一個總結。可能係被委任得做委員嘅，喺社會上一定有番咁上下地位，唔知係咪貴人事忙，Emily發現婦委會同平機會有委員嘅出席率認真麻麻，睇嚟真係要加把勁。


好似婦女事務委員會，以醫生身分獲委任嘅許家驊，由2009年上任至今14次會議，只出席咗兩次。許醫生同Emily解釋，自己近年轉咗去一間私人公司做總裁，但婦委會好多時都揀平日開會，撞晒辦公時間，但佢強調，佢加入咗婦委會轄下嘅公眾教育小組，原則上都去足晒。


許家驊訴苦：撞辦公時間開會長

婦委會九成委員都係女士，身為幾個男丁之一嘅許醫生又訴苦，婦委會大會每次都有好多唔同嘅議題傾，又要逐一報告進度，每次開幾個鐘，都幾辛苦。


解釋話撞立會開會

另外，啱啱當選立法會議員嘅「法律超人」謝偉俊，2009年加入平機會，不過，大會嘅三分之一會議都無出席，其中「法律及投訴專責小組」嘅19次會議，就缺席咗接近半數（9次）。謝偉俊話，好多時開會都撞立法會開會，而立法會較重要，唯有缺席咁話。