CY﹕無逼政策局「交數」谷民望

【明報專訊】特首梁振英CY上場後要搞百日維新，有報道話佢向各政策局發電郵叫公務員「交數」，提供民生政策建議，幫手改善政府民望，搞到公僕有壓力咁話。不過，CY噚日出聲明澄清，話為咗籌備《施政報告》，所以特首辦一如以往向各政策局發電郵，邀請各司局交政策建議，等佢可以稍後諮詢新一屆立會議員，唔係逼下屬「交數」咁話。


民調﹕CY評分跌至「肥佬」

特首辦重申，CY會急市民所急，帶領香港「穩中求變」，有好嘢就會「成熟一項推一項」。不過，據無綫新聞部委託中大進行民意調查，CY嘅評分由7月時嘅54分跌到今周47分。同時對CY民生工作表示有信心嘅受訪者，由30％減至21％，話無信心嘅就升到32％。


調查喺今個禮拜二及三訪問540人，負責調查嘅中大新聞及傳播學院教授蘇鑰機話，CY評分下滑到唔及格，情况好似曾蔭權當年推副局長任命時咁，市民對佢嘅民生工程信心動搖，對CY嚟講係警號。