公民黨人力都唔去CY飯局

【明報專訊】特首梁振英下周初宴請立法會議員食晏，繼民主黨唔畀面，講明CY唔肯撤回國民教育科就全體唔出席之後，公民黨同埋人民力量都話唔去。公民黨黨魁梁家傑話，CY唔肯同民間反國教大聯盟進行不具前設會面，又砌詞迴避社會上極之清晰嘅撤科訴求，「僅禮節式宴請而不能作認真討論」，所以唔去食飯。


傑哥覆信CY，話公民黨以「擋住香港赤化」為競選政綱，承諾選民喺議會內爭取真正撤回洗腦國民教育科，包括公民黨在內嘅8個泛民主派政黨及團體，都表明會喺議會內以私人草案方式阻止推行國教科。傑哥仲話，有時間食飯，倒不如開會傾國民教育點收科！


長毛﹕就算去都係去示威

人民力量黃毓民話，除非係對政策同施政報告等提意見，否則一般係唔會出席呢類「酬酢」。毓民又話，作為反對黨，過往特首曾蔭權宴請佢都唔去，所以CY都唔例外。社民連梁國雄就話未諗去唔去，但就算去，都係到場示威。


工黨張超雄就唔同，佢就想見CY，主要係想到時邀請梁振英出席殘疾人士高峰會。另外兩名工黨議員李卓人和何秀蘭唔使諗咁多，因為出咗埠，未必趕到返嚟。