鬍鬚曾請暑期工做「槍手」

【明報專訊】啱啱過去嘅暑假，財政司長曾俊華一如過往「收」，請咗兩個90後大學生做實習生，一個幫手做秘書，幫佢安排活動行程，另一個做「槍手」，幫財爺代筆覆信畀市民。財爺就話，兩個年輕人無公務員嘅包袱，反而敢提出唔少天馬行空嘅想法，衝擊到佢老人家嘅思考角度，而佢亦有機會去了解新一代年輕人嘅想法。
兩個實習生來頭都唔小，一個係喺港大主修工商管理及法律雙學位嘅李俊熙（Chester），另一個係喺加州大學洛杉磯分校（UCLA）主修商業及經濟學嘅張芷澄（Chelsea），而李俊熙仲係財爺喇沙嘅小師弟。
財爺亦叫佢哋就香港經濟同金融發展做啲政策研究。張芷澄仲有協助部門同事，幫財爺安排去莫斯科參加APEC財長會議嘅行程，當佢見到行程排得密麻麻，就講笑話財爺呢份工「唔易做」。李俊熙幫手回覆市民來信，佢話見到市民訴苦，感受到「家家有本難念的經」，會盡快將市民求助個案轉交相關部門處理。