CY同議員食晏 要求零招呼

【明報專訊】特首梁振英（CY）今日會請立法會議員食晏，聯絡感情，但噚日CY就帶埋老婆唐青儀搶先入上水同粉嶺，同民建聯嘅北區區議員劉國勳夫婦，同埋黨友兼北區區議會主席蘇西智食咗餐飯，仲快過見班立法會議員。


想低調行事 食完自動走

山長水遠走入粉嶺，蘇西智同「梁粉」劉國勳，帶特首去聯和墟一間相當出名嘅客家菜館食飯，菜館老闆漢哥話，特首一行點咗4、5個餸，都係傳統客家菜，好似燜豬肉、馬友鹹魚等等。漢哥仲話，劉國勳特別提佢，唔使搵專人招呼佢哋，食完飯自動會走，似乎想低調行事，所以漢哥都無特別招呼佢哋。


劉國勳係CY忠實粉絲，早喺1月已經表明撐CY做特首。近期內地水貨客問題鬧得火熱，劉國勳同蘇西智噚日就特別帶CY視察上水港鐵站。劉國勳話，CY好關心水貨客引起嘅爭議，又話CY提到上星期已經同內地海關反映，希望兩地部門可以做多啲嘢，盡快解決問題。不過，劉國勳將同CY嘅相片放上facebook，即刻畀人話佢同CY「抽水」，仲有人問劉國勳有無請CY飲益力多，因為益力多係水貨客熱門帶嘅貨品。


梁粉劉國勳上載合照被指抽水

特首辦發言人就話，今次北區之行唔係官方行程，只係CY嘅私人活動。至於市民對水貨客不滿，同埋擴大非深圳戶籍居民可以一簽多行嘅爭議，保安局已經着手處理，保安局長黎棟國都話，佢哋已經同內地部門加強堵截。