劉江華永不停步

【明報專訊】民建聯劉江華雖然喺超級區議會選舉輸咗，但噚日仍然同喺新界東當選嘅黨友葛珮帆去馬鞍山謝票，在場已經有義工等佢哋，喺劉江華到場時將心意卡送畀佢，鼓勵吓佢；有支持者同劉江華講無諗過佢會輸，所以屋企有人配票畀工聯會陳婉嫻喎。支持者不離不棄，劉江華噚日都顯得幾開心，仲同街坊講會繼續努力喎。


支持者以為夠票 投嫻姐

不過，劉江華同Emily講，話仲未靜落嚟諗清楚前路，有人建議佢進修、入政府，亦有人叫佢留喺民建聯繼續服務，佢話雖然仲未決定，但一定唔會停落嚟乜都唔做。對於近日有講法指佢落敗其實係民建聯棄保，劉江華就話贏輸有好多因素，強調民建聯全力支持佢同埋李慧琼參選，佢自己一早都知部署有風險，家輸咗亦會尊重結果，不怨天尤人咁話。


至於愛徒葛珮帆勝出，葛就話對師父落敗覺得好傷心，話區內支持者對劉江華落敗都好激動，自責投票時以為劉江華贏梗，所以自行配票畀李慧琼，點知最終劉江華就輸咗喇。


呢個說法或者民建聯都要諗吓，點樣令支持者可以聽晒佢哋話，令佢哋嘅配票策略更完美囉。