梁志祥專劏白鴿

【明報專訊】民建聯梁志祥喺立法會選舉爭到新界西最後一席（即第9席），僅贏民主黨李永達近千票，係全港贏得最險嘅直選議席。其實梁志祥打敗民主黨有往績可尋㗎，早喺1995年喺當時嘅區域市政局選舉，佢以70票之微贏咗民主黨對手，名副其實係白鴿黨殺手！


95年選舉險勝張賢登

梁志祥做咗18年區議員，其實選舉經驗豐富，今次立法會佢張名單攞咗33,777票，只係比李永達多985票，真係好險。但佢同Emily講，佢以前選區局都係靠些微票數贏，如以4256票對4186票打低民主黨嘅張賢登，當年都係贏得一額汗。不過，佢就講笑話選舉時無論得票第一或第尾，入到立法會，70個議員平等，每人都係1票，所以毋須太執著票數多寡。


不過，佢話今次得票數目比自己預期嘅3.5萬少，因為無諗過鄉事背景嘅陳強同埋何君堯會吸走咁多票，估計喺鄉郊區域無咗幾千票咁話喎。