鍾樹根外母 大鬧催票電話

【明報專訊】民建聯其中4名候任立法會新丁，蔣麗芸、鍾樹根、梁志祥同何俊賢，噚日同傳媒茶敘。民建聯嘅催票能力一向鶴立雞群，但鍾樹根話，佢外母收過其他黨派嘅催票電話，「（對方）即刻被我外母鬧到『趴街』」。鍾樹根憶述選戰過程，話好多謝曾鈺成嘅配票策略，原本佢主攻東區，但曾鈺成之後將成個灣仔畀埋佢拉票，佢仲透露曾鈺成諗過缺席所有選舉論壇，畀鍾樹根多啲曝光機會。不過，鍾樹根似乎信心爆棚，佢話一開始就覺得自己會贏喎。


相反，出選新界西嘅梁志祥就話自己贏得驚險，要多謝主席譚耀宗無私奉獻，決定畀佢喺譚sir嘅地盤屯門拉票，令佢喺屯門拎到關鍵嘅2000幾票，最終以不足1000票之差險勝民主黨李永達。


譚耀宗無私奉獻梁志祥

至於劉江華喺超級議會墮馬，梁志祥喺選舉日有無幫劉江華告急呢？佢就話當日根本唔知道劉江華勢危，而且消息好混亂，佢仲聽聞有李慧琼嘅宣傳車去咗新界拉票，而新界應該屬於劉江華嘅拉票地區。


另外，有報道話何俊賢會喺12月同女朋友拉埋天窗，佢噚日就話係記者誤會咗佢嘅意思，佢接受訪問時只係話結婚可遲可早，佢噚日仲連自己係咪拍緊拖都唔肯講