旅遊警示 內地免役

【明報專訊】近日內地民間保釣反日情緒高漲，有啲示威最後更演變成騷亂，唔少香港市民睇完報道後話「好驚青」，有人喺網上提出，要求保安局向內地發出旅遊警示，但原來保安局係唔會咁做嘅。


網民籲Yuki、Suki勿返內地

保安局同Emily講，外遊警示制度係用嚟協助巿民較清楚掌握到外地時可能面對嘅人身安全風險，並作出相應安排。正如其他提供旅遊警示嘅國家，好似澳洲、加拿大、英國，都唔會向佢哋國內地區發出旅遊警示，所以香港嘅警示制度係唔包括內地城市。


除咗呼籲保安局發旅遊警示，本港有網民認為，近日內地嘅示威已經變得唔理性，擔心香港人返內地會有危險，噚日特登提醒前往內地或者喺內地工作嘅香港居民，為自身安全着想，出街盡量避免著日本牌子衣物同唔好佩戴日本卡通公仔首飾，仲要唔好去日本食肆同唔用日產嘅手提電話同相機。仲有一項，就係話連改咗日文名字，好似Yuki同Suki等等，都唔好返內地，否則後果自負咁講喎。


周末防空警報 粵民零警覺

此外，近日有內地電視台喺講完釣魚島新聞後，提到廣州喺上周六有防空警報，話好多人唔當一回事，報道話因此要多了解居住附近有無防空洞，「入洞」時記得帶齊水同急救用品。