毛孟靜想做IT委員會主席

【明報專訊】上屆立法會選舉，公民黨毛孟靜（Miss Mo，圖）以些微票數落敗，今屆佢捲土重來，成功奪得一席。佢噚日同Emily茶敘，話有興趣做來屆資訊科技及廣播事務委員會嘅正或副主席，希望原任主席黃毓民唔好介意喎。


因五星旗與毓民破冰

Miss Mo話，佢做過中英文電視電台同報紙，本地海外傳媒都試過，範疇都算多。佢話，黨友湯家驊負責工商，陳家洛負責教育，郭榮鏗負責法律，郭家麒就負責醫療，Miss Mo個人認為公民黨應派黨魁梁家傑競逐內務委員會正副主席。傑哥就話呢個提議言之尚早，仲要睇吓泛民有冇其他人選。


另外，上屆Miss Mo畀毓民追擊，間接令佢落敗，佢直言有心結，4年來無同毓民打過招呼，不過今屆選舉論壇兩個人就有件趣事，話說民建聯蔣麗芸（Ann）畀毓民問5星旗代表乜，問到佢口啞啞，原來Miss Mo都想問呢條問題，但佢就怕Ann識答，毓民就話「佢邊度識啊，（你估佢）讀書嘅咩」，算係打破兩人「冷戰」。