港人買保險 危疾險少捧場

【明報專訊】講起買保險，多數人都只係諗到人壽或者醫療保險，危疾保險反而冇乜人捧場。友邦（1299）託香港大學做嘅調查發現，無論係過去一年買過嘅保單，抑或係嚟緊一年打算買嘅保單，危疾都喺三者之中包尾。當中又以後生仔最少，24歲以下嘅保單持有人，得23%有買危疾保險。咁又係嘅，點會有後生細仔擔心自己會身患重病？


不過友邦香港首席巿場總監李滿能提醒大家，而家有危疾年輕化嘅趨勢，所以後生仔都唔好掉以輕心，小琴都要諗下自己好唔好買返份。


係咪年紀愈大嘅人，愈會買危疾保險呢？咁又唔係喎，原來係介乎25歲至44歲嘅人買得最多，有成超過70%，當中大部分人亦都結咗婚。相信係因為呢班人啱啱成家立室，人工又有番咁上下，可以供多份保險。