陳家強﹕有鑊氣先好味

【明報專訊】香港專業及資深行政人員協會（專資會）真係巴閉，除咗喺立法會選舉中有6名成員當選外，原來現屆政府亦有7名主要官員同呢個會有關係，其中律政司長袁國強原來係專資會前任副會長，財經事務及庫務局長陳家強係創會副會長，食衛局長高永文係創會會員。


吳克儉話返工兩月似7年

專資會前晚舉行6周年誌慶晚會，特首梁振英（CY）帶同一班司局級官員到賀，CY事忙，致辭後就離開，不過到場嘅司局級官員就好畀面喇，不單坐低食飯，更嚟一場「與司局長有約」，袁國強、教育局長吳克儉、高永文、陳家強、發展局長陳茂波齊齊喺台上分享入「熱廚房」嘅感受。


袁國強話好多嘢要學，又話家唔似以前私人執業，多嘢做可以唔接case。吳克儉訴苦，返咗工兩個月，但感覺似做咗7年咁耐。陳茂波前晚個樣都有啲殘，眼肚突晒出嚟，佢話主要官員返工時間好長，笑言主要官員好快會提出標準工時立法。


不過，薑愈老愈辣，由曾治年代過渡到梁治年代嘅陳家強就表現淡定，負責管數嘅佢話，錢可以解決嘅問題，其實就唔係問題，但最慘政府家面對唔少爭議，關鍵不單純係錢。佢又講笑話，自從政府加添了一批新官員，廚房的確熱咗好多，但佢認為特區政府係中式廚房，有鑊氣先好味，唔似西餐凍冰冰唔好食。不過「鑊氣」呢兩個字聽喺陳茂波、吳克儉耳裏，真係未必笑得出。