接陸恭蕙葉溵溵記招擔大旗

【明報專訊】一手創辦智庫「思匯政策研究所」嘅陸恭蕙做咗環境局副局長後，將多年經營嘅心血交咗畀跟隨佢十幾年嘅拍檔葉溵溵。溵溵噚日首次擔大旗主持記者會，會後同一班記者傾偈，話雖然陸恭蕙做咗官，但思匯批評政府唔會留手。


思匯研究﹕船排放二氧化硫「殺人」

思匯噚日公布珠三角船舶排放研究結果，話每年本港因船排放二氧化硫而額外死亡嘅人數原來有385名，如果政府規定遠洋船喺香港水域轉用含硫量0.5％（現時為3.5％）嘅柴油，死亡人數可減半，建議政府推行。


葉溵溵話，思匯除咗關心環保政策，未來亦會關心多啲其他社會政策例如平等機會、婦女、貧窮等等，冷門嘅檔案法都會研究。對於陸恭蕙在位嘅時候，思匯收過電力公司同油公司嘅捐款，又被指推銷核電，溵溵話捐款並非用嚟做指定研究，唔存在衝突咁話。


對於陸恭蕙做咗官，葉溵溵承認政府與環團嘅溝通會改善，但佢不忘提醒政府，近年收集民意方面好似出咗問題，應該着力改善同市民溝通。