「公安叔叔」上水請願

【明報專訊】最近政府着力打擊上水港鐵站附近嘅水貨客，仲話會同內地部門溝通，希望對方加強打擊水貨集團。說時遲那時快，噚日朝早上水站外真係有一個身穿整齊制服嘅公安叔叔現身，若非佢舉住一個示威牌，霎時間真係會以為佢係「跨境執法」，到上水拉水客。


有傳維權多年

由於呢位叔叔嘅裝扮太突出，有市民報警，3名軍裝警員到場了解，知道呢個「公安」原來只係請願，事件不涉刑事成分，所以無拘捕任何人，而佢亦都離開現場。有網民根據呢個叔叔嘅示威牌上內容喺網上搜尋，相信佢應該係深圳市前公安張建華，張曾經協助唔少上訪家庭，喺內地搞維權搞咗好多年，估唔到會著埋公安制服嚟香港請願，只要唔係跨境執法，相信大家都唔會介意，反而令香港嘅示威風景更加豐富。