唐唐：真心同情CY

【明報專訊】梁振英（CY）出盡力勝出特首選舉，上任唔夠百日就撲火都撲唔停，失落特首寶座嘅唐英年卻塞翁失馬，Emily噚日喺金鐘太古廣場嘅COVA咁啱撞到唐唐同唐太結伴買咖啡「止癮」，仲巧遇立法會「91同學會」嘅民主黨張文光，兩個老友即刻互拍膊頭，雞啄唔斷。


少少發福 換咗潮眼鏡

久未喺鏡頭前曝光嘅唐唐春風滿面，仲有些少發福，著住件花恤衫嘅佢，放下舊嗰副老實型眼鏡，改戴一副深啡色粗框潮眼鏡。佢笑言戴起新眼鏡後，好似重回讀書年代咁。


唐唐好開心咁同Emily講，特首選舉後已去咗兩轉法國，到著名嘅酒莊朝聖，佢即晚又同唐太赴美陪囡囡開學。生活優哉游哉嘅唐唐話，真心同情CY，因為佢從未見過一個新政府上場係如此艱難，又話佢上次同CY食飯時，係好衷心地祝福佢工作順利喎。


重返商界 掌家族生意

上年9月尾辭去政務司長一職準備參選特首嘅唐唐話，仲有個幾禮拜就過完冷河，之後會重返商界，接掌家族針織生意。被問到會唔會為業界爭取利益，佢話紡織及製衣界已經有候任議員鍾國斌，暗示暫時無意返政界呢個熱廚房。


另外，CY太太梁唐青儀噚日出席陳佐洱的新書發布會，本來佢諗住排隊攞陳佐洱簽名，不過見到Emily同一班行家問佢點睇CY民望跌至新低，佢定神過後就左閃右避，只係開金口講「成個（政府）團隊都好辛苦、好落力」，又要求行家唔好阻佢，最後由酒店職員護送離開。