出稿慢礙採訪 警3招改善

【明報專訊】做突發新聞嘅行家近年苦不堪言，因為自從警方通訊系統數碼化後，未能再透過聽警方電台趕赴現場採訪，家只能等警方出電稿，先知到邊到有車禍、打劫或傷人案。但警察公共關係科（PPRB）人手有限，有時出稿難免太慢或提供資料太少，影響到採訪，令雙方關係「僵僵哋」。不過PPRB阿頭黃國偉昨日同突發行家會面，講起過去幾個月左度右度，終於諗咗三條新橋，加快罪案案件資訊發放，其中包括以電郵代替傳真出稿，Emily衷心希望新措施可以帶來雙贏啦。


每日「投選」最hit新聞

Emily當然歡迎警方改用電郵代替傳真，始終快啲方便啲。除此之外，比較有趣嘅新方法，係PPRB整咗一個好似「我最喜愛的突發新聞」投票系統，容許新聞機構用音頻電話投票決定當日邊幾單案件最受重視（歡迎），PPRB其後就會按投票結果，優先就最受重視嘅案件，去同查案阿sir攞料同出稿。


仍要忍耐電話無人聽

最後一條橋，係PPRB會增加突發事件快訊的內容，例如，將來會喺話畀傳媒聽剛發生了車禍嘅同時，會講埋有幾多人傷、涉及幾多輛車、有冇人被捕等，三大新措施下星期中就會出籠。但對於最棘手嘅PPRB唔夠人接聽行家電話、電話經常不通，黃sir就話要等上層批准加人手先可以解決，請大家忍耐一下喎。