區選候選人拉票 選民電郵通天

【明報專訊】相信唔少選民都收過候選人嘅拉票電郵，但你又有冇試過，喺拉票電郵見到朋友嘅電郵地址？話說上屆區議會選舉，有議員寄拉票電郵畀一班選民時，居然唔記得用「副本密送」呢個功能，搞到電郵地址畀全部收件人睇到。選民後來向私隱專員公署投訴，最終公署要向嗰位議員轉達投訴人嘅關注，同埋提醒佢，日後用電郵傳信息，要保密選民個人資料。


其實，選舉私隱陷阱又點止咁少，選舉管理委員會噚日公布《區議會選舉活動指引》嘅新修訂，當中披露咗另外兩個個案，其中一個議員，喺幫完一個選民爭取傷殘津貼後，打番畀嗰個選民拉票，仲話已經「口頭通知」佢嘅個人資料會用作聯絡用途。另一個政黨，就用咗協助大廈管理嘅聯絡電話拉票。