微軟投訴中石油用老翻

【明報專訊】中國內地用緊嘅電腦軟件，十之八九係翻版，呢點大家都心知肚明。不過堂堂國企中國石油（0857），近排竟然也因為用翻版嘢畀微軟投訴，小琴點睇都覺得有損國家形象。


小琴喺彭博通訊社見到，微軟上個月向中國副總理王岐山工作小組遞信，投訴中石油、中國郵政、中鐵建、中國航信4家大牌國企，用翻版Windows同埋Office。微軟仲憤然爆料，話中石油超過四成嘅Windows同埋Office都係翻版。中石油至今未承認；中鐵建個回應就好得意，話不排除有下屬部門會用翻版軟件，不過「顯然沒有這麼大的比例」，小琴聽到都覺得有小小丟架。


中國翻版氾濫侵犯知識產權，問題存在明顯唔止一兩年。13億人口大國，如果人人唔用正版用翻版，軟件廠商損失必然巨大，唔怪之得微軟終於要企出來，瞄準國企投訴啦。