秦始皇展20萬人睇過

【明報專訊】由康文署同陝西省文物局合辦嘅「一統天下﹕秦始皇帝的永恆國度」展覽，開放兩個月以嚟已經吸引逾20萬人參觀，展覽最後階段（10月15日至11月26日）嘅門票今朝10點起開始預售，有興趣嘅朋友記住喇。


門票喺城市電腦售票處同歷史博物館售票處發售，市民亦可致電信用卡訂票熱線2111 5999，或透過城市電腦售票網買飛。至於10月14日或之前嘅門票，仍接受訂購，但係嚟緊兩個周末嘅日間門票則就快沽清。展覽入場費10蚊，4歲以下有成人陪同可免費入場。展覽開放時間為上晝9點至晚上10點半，逢周二休息（公眾假期除外）。歷史博物館網址為http://hk.history.museum，查詢電話2724 9042。


另外，噚日啟程訪京嘅政務司長林鄭月娥話，喺行程最後一日會去故宮博物院，希望能夠加深兩地文化交流，帶多啲精彩展覽畀港人欣賞。