謝志峰殺一儆百使得

【明報專訊】政府前日舉行新界東北發展諮詢會，搞到七國咁亂，港台噚日喺維園涼亭舉行嘅《城市論壇》就繼續討論新界東北發展，節目未開始，Emily已經聞到火藥味，台下阿伯對候任新界東立法會議員范國威、「反對香港『被規劃』行動組」成員陳劍青虎視眈眈，其中一個坐最前排嘅阿伯不斷高聲呼叫，中間夾雜粗言穢語，為咗避免混亂場面重演，前日擔任諮詢會主持嘅《城市論壇》主持人謝志峰事先聲明，若有人滋擾節目，會被請離會場。


但節目甫開始，坐前排嗰位火氣十足嘅阿伯忍唔住再高聲呼叫，謝志峰即刻睥住佢，然後示意在場人員請阿伯出去。呢招殺一儆百果然有用，節目期間在場市民大部分時間都好守規矩，只係當有政黨話支持發展時，先有連串噓聲，因為噚日出席嘅市民，大多數係受發展計劃影響嘅村民，難怪佢哋咁激動啦！