煲呔做政協常委？

【明報專訊】曾蔭權卸任後，去向一直成謎，早前有傳佢會做全國政協常委。不過，Emily噚晚喺中華總商會國慶酒會，遇到政協常委陳永棋，棋哥一聽就話政協常委呢個位咁低，應係由司長做，特首「點會做」咁話。棋哥話，今屆政協常委「僧多粥少」，至於Donald會唔會同董建華一樣做全國政協副主席？佢話自己無資格講，叫Emily等十八大喎！


有人就話，特首選舉落敗嘅唐英年，既然做過司長，係咪應該做政協常委。棋哥就猛話唐英年係「退休司長」，點都唔肯再講落去，要大家估。棋哥一直支持唐唐參選特首，家就話現任特首對香港「好有心」，會支持梁振英施政。記者問佢，CY有心，「咁有冇力」，棋哥就話CY都「好勤力」。


棋哥又話，香港家需要團結，唔應該「你排斥我，我排斥你」。