李華明唔接兩電生意

【明報專訊】民主黨李華明唔做立法會議員，轉行政治公關，公司會喺10月正式掛牌開檔，仲改名叫做「明理顧問服務有限公司」，英文名就用番李華明自己嘅英文名「Fred Consultancy」。阿Fred話要努力搵生意開飯，雖然離任立法會議員，無所謂「過冷河」嘅工作限制，但佢自己都會識做避嫌，既然議員任內喺議會處理能源政策，咁就唔會接電力公司生意。


新公司10月開檔 取名「明理」

阿Fred話公司暫時只係一人公司，租用秘書公司嘅迷你辦公室，亦差唔多搞掂公司註冊，10月正式掛牌。睇番公司註冊處資料，佢持有嘅公司原本叫冠年有限公司，但啱啱喺噚日改名為「明理」，董事係佢本人。


公司雖然未正式開檔，但佢話家已經同人傾緊生意，但就話費事招人口實，以前做議員時搞開嘅事務，佢離任後就唔想涉足，所以就算電力公司肯畀生意佢，佢都唔會接。至於地產商，佢就話以前較少跟房屋政策，應該無咩利益衝突。做政治公關，主要係為客戶提供專業意見，做政治游說，佢話服務可以按月收錢，亦可按工作項目或按小時收錢，有信心可以搵到食。佢已經向同行朋友，好似何安達、林旭華等打過招呼，如果大家有好路數又要人幫手，就請大家關照一下咁話。


過埋呢個禮拜，阿Fred身分就唔係議員，但仍然係民主黨人，會繼續幫手搞黨務，而九龍東嘅地盤就會交畀黨友胡志偉，有需要時都會幫手。