林健鋒甩底傾唔成

【明報專訊】建制派同泛民噚日先後開會，敲定嚟緊4年嘅座位表同事務委員會嘅分工，可惜兩邊各自開咗成個鐘，都只係傾座位表，大家最關心嘅分工就未搞掂。民建聯譚耀宗話，因為工聯會代表同經濟動力嘅林健鋒（Jeffrey）臨時「放飛機」，所以傾唔成。不過，林健鋒就話冇收到通知要開會，唔知係咪大家溝通出問題喎。


Emily就覺得事有蹺蹊，事關前日Emily同其他記者行家喺一個酒會上，提過Jeffrey噚日早上10點鐘要去開會，佢當時有啲愕然，但點都記得啩。有人就取笑佢，係咪為咗同梁振英會面，為加入行會做準備，先至扮失憶唔去開會。至於真定假就唔知喇。


盧偉國想同經濟動力組聯盟

新一屆立法會嘅座位表亦可見唔少端倪，工程界盧偉國、金融服務界張華峯，同埋Jeffrey及梁君彥等經濟動力成員坐埋一齊。盧偉國話，唔會考慮加入經濟動力住，但有興趣同呢幾位工商界議員合組工商專業聯盟。建築、測量及都市規劃界謝偉銓，亦一如所料同工業界林大輝、醫學界梁家騮同保險界陳健波一齊坐，正式加入「四散人」行列。


工黨新民盟隔開人力民主黨

泛民方面，就刻意搵工黨同新民主同盟范國威等，隔開人民力量同民主黨，避免「惹火尤物」同「放火嘅人」再起爭拗。