新聞類別
財經
詳情#
【明報專訊】上兩個禮拜嘅立法會選舉，似乎大家對結果都唔多滿意喎。唔緊要，大家又有機會投票喇！講緊嘅唔係雙普選呀，而係匯豐銀行嘅優質服務選。大家可以去分行或者上網，票選最鍾意嘅匯豐服務，又或者係分行同埋電話服務員。唔好睇少呢個選舉呀，一嚟可以表揚吓做得好嘅員工；最緊要係參加投票，有可能會抽中Macbook Air又或者55吋LED電視㗎！連小琴都忍唔住即刻投咗票！
匯豐不嬲畀人嘅印象都係好正經同嚴肅，小琴平時除咗見到佢哋啲banker同埋公關之外，見得最多就係門口嗰兩隻銅獅子喇。不過今次匯豐就破格請咗好受香港人歡迎嘅森美同小儀，幫佢哋呢個投票做宣傳。匯豐香港零售銀行及財富管理業務主管施穎茵話，佢哋今次都希望打破傳統嘅形象，同客戶親切啲。
可參加抽獎 送Macbook Air
除咗搵明星做宣傳，匯豐都搞唔少「花臣」㗎。
就好似2010年開始嘅智醒老友記計劃咁，邀請啲退休人士去匯豐分行度做兼職，畀佢哋過吓日晨之餘，仲可以服務埋年長客戶，話晒大家同聲氣，溝通起上嚟都易啲吖！唔講唔知，原來呢個計劃好受歡迎㗎，而家匯豐在全香港已經有160個老友記，比起舊年足足多咗一倍，嚟緊仲會再請㖭。咦，老友記咁幫得手，唔知匯豐前線員工驚唔驚又會有裁員危機呢？
email:piano@mingpao.com
回應 (0)
