虛白齋藏書畫展 「有血有淚」

【明報專訊】位於尖沙嘴嘅香港藝術館，收藏咗唔少名家國畫，其中唔少係由新加坡華僑劉作籌捐贈，家藝術館「虛白齋藏中國書畫館」就係以佢建立嘅「虛白齋藏」命名。適逢今年係書畫館開館20周年，藝術館就揀咗20位書畫名家經典作品展出，當中唔少畫可以留存至今，其實真係「有血有淚」！


其中一幅藏品係清初畫家石濤嘅《長干風塔》（圖），原來劉作籌喺8年抗戰期間，以2800蚊新加坡幣，從新加坡商人朱國良手上買番嚟。不過有一次空襲，劉宅受大火波及，佢唯一從火場攞番嘅就係呢幅畫，都算係佢嘅隨身之寶。


另外一幅畫係「清初四僧」之一弘仁嘅山水扇面《仿王紱山水》。原來民國時代有人不惜以千圓「大洋」競購，「千金扇」之名就係咁樣流傳落嚟。除咗石濤同弘仁，仲有唔少明清朝名家總共34幅作品展出。展覽由噚日開始直至明年9月30日。