胡志偉買「第二架車」賀當選

【明報專訊】民主黨胡志偉當選立法會議員後，噚日買咗架車畀自己做禮物慶祝，但唔係汽車，而係一部二手單車。原來佢係環保人，平時鍾意踩單車出入，喺九東地區上山落斜，前幾日仲發現，由旺角踩返黃大仙屋企，沿界限街同太子道走只需要15分鐘，快過搭小巴！今次買多部靚車係打算放一架喺立法會，方便佢喺港島代步！


幾次被偷單車 仍無懼泊街

呢件禮物唔平，盛惠5100蚊，胡志偉愛不釋手，話如果係新車肯定要5位數字！家佢有兩部車，佢話前幾日見到中環立法會外有個有蓋單車泊車位，政府重地都應該唔會有人偷車，所以先決定買部車放中環。不過，佢之前已畀人偷過幾次車，所以老婆對佢買車都有微言！


大熱天時喺街上踩車咪好辛苦？胡志偉話呢個只係習慣問題，而佢成日會喺黃大仙踩車返去慈雲山工作，仲話沿斜路踩上山，一陣就到。由於要成日踩斜路，所以先唔慳得，要買部性能好少少、價錢貴少少嘅車。但香港市區車多路窄，踩車要注意安全，胡志偉就話以前喺美國讀書時已有踩車習慣，試過一次同私家車「炒車」，佢成身傷痕，自此之後好小心，唔會同汽車搶位。


佢鍾意踩車，但批評香港道路設計極唔鼓勵市民採用環保交通工具，希望入立會後能推動單車友善政策，提倡喺馬路留闊兩呎畀單車行，仲有將坑渠蓋由斜坑紋變成方格，話如果政府做到，已經係德行，可大大減低單車炒車風險。佢仲鬧政府嘅啟德發展計劃，雖然係新區，都唔肯喺區內推廣用單車。


講開單車，警方過去一星期推行單車安全運動，喺各區發出208次口頭警告同埋808張傳票畀違例騎單車人士。警方話今年頭8個月有1540人因踩單車傷亡，其中6人死亡。