黃成智喪父 嘆子欲養而親不在

【明報專訊】民主黨黃成智丁父憂，患有心臟病嘅黃父，噚日喺屋企跌倒，不幸去世，終年85歲。黃成智原本諗住10月搬返去照顧老人家，感慨「子欲養而親不在」，在此Emily希望佢節哀順變。


黃成智同Emily講佢爹哋一直有心臟病，前兩年又跌斷腳，不良於行，佢自己又因為天台僭建搬走咗，所以爹哋一直要由家姐同外傭照顧。黃父噚日早上起身，唔知係咪心臟病發跌落地，外傭雖然發現佢跌親，但係屋企人都見唔到黃父最後一面，黃成智直言「好痛心」，「本來一齊住就乜事都無」。


黃成智話佢同爹哋都係基督徒，返同一個教會，聯絡咗牧師打點爸爸身後事，又會將佢嘅骨灰安放喺十幾年前過身嘅媽咪隔籬。


對於失去立法會議席再痛失家人，成智話兩件事無關，已經將爹哋過身交託畀上帝，「唔需要太傷痛，好快復元」。