渣馬獎1000蚊

【明報專訊】一年一度嘅渣打馬拉松會出年2月24號舉行，全馬項目一向係非洲跑手嘅天下，大會今屆為香港跑手設特別獎金，3個鐘內完成全馬賽事（42.195公里，女子組限時3個半鐘），就會有1000蚊獎金。呢個特別獎金只限香港永久居民享有，但唔易攞㗎，目前馬拉松香港紀錄要追溯到1984年，由Paul Spowage跑出2小時21分10秒；女子紀錄就喺2004年，陳敏儀跑出2小時35分49秒。


講番今屆賽事，參賽名額由7萬加到7.2萬，認真墟冚。全馬、半馬同輪椅賽下個月24號開始接受報名，至於最多人參加嘅10公里賽，要等到下個月31號先可以報名。


舊年賽事有26歲跑手猝死，業餘田徑總會主席關祺就話今屆賽事有11個水站同救傷站，安排比好多同類賽事完善。Emily喺度都奉勸各位跑手量力而為，有足夠練習同良好身體先去參加。