謝偉銓長毛天各一方

【明報專訊】立法會會議廳嘅座位，一坐就要坐4年，所以唔少議員揀位時都好謹慎。Emily噚日攞到新一屆立法會終極座位表，發現一啲奇怪事——事關負責協調建制派座位嘅民建聯葉國謙，日前展示嘅「第4版」座位分佈，建築、測量及都市規劃界議員謝偉銓明明係同佢嘅「四散人」兄弟坐埋一齊，旁邊就係社民連「長毛」梁國雄。不過，最終版就顯示，謝偉銓由會議廳嘅中心位置，調到一個角落位，同勞工界議員一齊，莫非佢怕咗長毛？


謝偉銓係專業界別出身，所以佢加入「散人」行列，同工業界林大輝等一齊坐，大家都覺得順理成章，家陣佢被調到會議廳最右上角，同工聯會及勞聯幾名勞工界議員坐埋一齊，反而顯得九唔搭八。


至於長毛旁邊「被嫌棄」嘅位置，家花落誰家呢？答案係民建聯曾鈺成。


曾鈺成補位 倘做主席丟空

曾鈺成係民建聯一分子，卻要離開黨友，夾喺長毛同新民黨田北辰之間，一睇就知係被人「過橋」。皆因佢極有可能連任立法會主席，即係話，佢呢個座位會長期丟空，可以作為長毛同建制派間嘅緩衝區，呢招果然絕！