惠陽「買房子，送老婆」

【明報專訊】買樓同埋結婚，睇怕係絕大多數中國人最大嘅兩個挑戰。不過，近排內地有地產開發商，似乎可以幫大家一次過滿足晒兩個願望：「買房子，送老婆」。


小琴第一眼睇到惠陽中央國墅園呢個廣告牌，真係嚇咗跳：為咗賣多啲樓，樓盤送家俬、送電器、送裝修都屬正常，不過「送老婆」就似乎難度太大，畢竟係人哋嘅終身大事，起碼要幫啲客搵到心水對象至得。事情咁古怪，問清楚啲先知，原來句嘢係「買房子，送給老婆」咁解，慳咗一隻字，令過路嘅人虛驚一場。


呢條擺明以搞笑吸引眼球嘅標語，好快就喺網上引起強烈反響。有網友留言開玩笑話「看來要去買2套」，仲有人借題抒發買樓壓力，話「突然感覺看到希望，但是那房價，我還是一輩子做光棍好了」，創意爆棚。不過話時話，喺現時中國社會，男方如果有能力買樓、討得女方歡心，娶老婆難度的確就大大降低，所以「買樓有老婆送」，都算有一定事實根據。


發展商澄清：「買房子 送給老婆」

不過呢，有律師就對呢個廣告噱頭潑冷水，話「送老婆」其實違反《中華人民共和國廣告法》規定，會令人以為真係有老婆送，涉嫌誤導消費者咁話喔。但小琴又覺得冇必要咁嚴肅，開發商咁講，純粹為咗吸引眼球、希望提升國慶銷情，動機無可厚非，絕大多數旁觀者都心知肚明。更何况，就算開發商真係幫每個單身男業主都分配一個老婆，有幾多人肯收貨，都仲係未知之數啦。