吳靄儀專心搵銀

【明報專訊】即將告別立法會嘅法律界議員吳靄儀（Margaret），噚日帶埋親手整嘅薑味蛋糕、美式曲奇同藍莓cupcake返立法會，同記者最後一次喺立會茶敘。Margaret透露，嚟緊喺黨內唔會再擔任副主席同黨團呢啲要務，會喺幕後做幫工。此外，就係做番執業大律師，重投法律工作搵真銀。


親手整甜品告別立會

社民連梁國雄同Margaret惺惺相惜，聽到Margaret告別，專登走嚟送一本書畀佢，就係《這是我最好的愛︰王爾德經典童話選》。Margaret就盛讚長毛，話長毛為堅持信念付出嘅代價，比佢自己多好多咁話。有前線記者亦帶來自己整嘅蛋糕，同行家分甘同味。


至於會唔會忍唔住走出來論政，Margaret話，未來嘅政治工作，一定唔會多過法律工作。查實Margaret呢幾年好少接case，都係時候要儲番啲錢。至於未來點推政改，Margaret就話「希望在民間」，認同黨友余若薇話立法會「唔係講道理地方」，未來只會更唔係，要重視點樣運用策略，推動運動。


對梁美芬想接棒有保留

對於梁美芬想做新一屆立會司法及法律事務委員會主席，Margaret話對西環干預司法事宜感到擔心。佢話，對梁美芬過去喺委員會嘅「參與方式同表達態度有保留」，又話自己當年擔任委員會主席時都係新丁，梗係支持黨友議員郭榮鏗接棒。