陳啟宗是范冰冰粉絲？

【明報專訊】話說小琴同事去咗瀋陽睇恒隆地產（0101）喺當地嘅新商場開幕，一向是財經界「金句王」嘅恒隆地產主席陳啟宗（Ronnie），被問到當地已經有唔少高檔次品牌的大型商場，同樣主打高端貴價品牌的恒隆新商場會唔會面臨好大挑戰，佢就好詼諧咁反問﹕「如果我係范冰冰，會擔心無男朋友嗎？」

之後就話如果係黃曉明，亦唔怕搵唔到女友，佢之後長篇大論強調自家商場嘅設計、服務都好掂，唔驚同其他商場比，但對答當中一直都范冰冰前，范冰冰後。


記者會多番提及范冰冰

完咗記者會，香港行家即刻問番佢點解咁鍾意講范冰冰，唔通係正牌「冰粉」？佢停低諗咗幾秒就笑笑口咁講，「我淨係識范冰冰一個。」小琴都理解，可能佢真係太忙碌，平時無咩點留意娛樂新聞啦。


暗批港人自相矛盾

近排香港嘅東北發展規劃問題搞到好熱鬧，自然都要問番句Ronnie點睇，佢同樣好幽默咁講咗句，好鍾意中國大東北，對內地東北大開發好有興趣之類，之後就語重心長咁補咗句﹕「一方面話唔夠地，一方面唔畀政府起樓，香港人自己決定啦。」