新2蚊5蚊大餅應市

【明報專訊】近年興用「八達通」同埋「易辦事」電子貨幣，用硬幣機會愈來愈少，但有人近日發現一批上有「2012」字樣的2蚊同5蚊大餅喺市面。金管局噚日同Emily講，因為零售、飲食同旅遊帶動，離港旅客會帶走硬幣，所以鑄造新一批共8000萬個2蚊、4000萬個5蚊應市，上月起流通。


金管局上次造幣喺1998 年，事隔14 年嘅新大餅，外形、圖案同舊款無異，只係年份改成「2012」字樣。金管局發言人話，自2004 年開始，本港嘅硬幣流通量開始增加，過去10年2蚊及5蚊硬幣分別錄得21%及32%嘅增幅，而97年前鑄造嘅「女王頭」硬幣流通量就平穩下降。