廣東政協豪睇煙花

【明報專訊】國慶日煙花夜，香港人喺維港兩岸逼餐飽睇煙花，親中人士就雲集灣仔會展呢個最佳地理位置睇。香港廣東省政協委員聯誼會噚晚喺會展筵開百幾席慶祝國慶，特首梁振英、政務司長林鄭月娥、發展局長陳茂波伉儷，以及前立法會體文界議員霍震霆都有到場。


陳茂波未提「劏房」 急急腳走人

現場所見，出席嘅賓客，大多數都係講普通話，Emily身在其中，儼如少數民族。喺「劏房風波」後罕有咁一齊公開亮相嘅陳茂波同太太許步明心情大好，阿Paul話係首次喺會展睇煙花，覺得好靚。不過，Emily仲未提「劏房」兩字，佢已急急拖埋太太走人。


至於同場嘅梁振英同林鄭月娥就繼續扮聾，面對記者有關學民思潮成員喺升旗禮被帶走一事嘅提問，拒絕回應。