何安達離巢開公司一腳踢

【明報專訊】前新聞統籌專員何安達（Andy）離開政府無耐，重操故業做番政治公關工作，Emily噚日喺國慶酒會見到佢，好奇咁問佢，啱啱離開官門就搞生意，要唔要所謂「過冷河」，避免利益衝突。Andy就話，佢再就業都有些少限制，因為佢以前嘅職位問題，所以做生意有兩不﹕唔可以承投政府新聞處，唔做得與特首辦有關嘅工作項目。


做生意兩「不能」

Andy話，呢啲限制對生意無咩影響，因為佢會主力做公營機構同埋私人公司生意。究竟政治公關做咩呢，點解近期咁多人入行？Andy話，家年代唔同，已經到咗互聯網、智能手機年代，可能發生一件好細嘅事，如果無及時應變處理，好容易好快鬧大，變成重大危機，而佢哋嘅工作，會包括為客戶提供意見，幫佢哋應對突發事故，亦會為機構企業開班，教佢哋了解家嘅政治形勢，例如新一屆立法會議員嘅背景，介紹政府政策，同埋點樣應對傳媒等。


Andy家仲係一人公司，仍然搵緊辦公室，但當接到j ob嘅話，就會按需要搵埋合適拍檔一齊做。