民主黨fb迅速悼念

【明報專訊】面對40年來死傷最嚴重嘅撞船意外，唔少政黨都希望出一分力支援，民主黨反應算最快，噚日凌晨已經喺facebook專頁update救災進度，仲將profile pic改為黑色以示悼念。民主黨總幹事林卓廷同Emily講，佢前晚9點得知事件，即刻聯絡創意媒體部長羅健熙，叫佢成晚update個fb。


工黨、社民連facebook，公民黨官方網頁，同埋好多電視台噚日將徽號改黑色悼念，新民黨就張貼沉船圖片，表示沉痛哀悼。林卓廷話，喺大災難面前，佢諗住民間可能想了解多啲件事，又搵咗長洲黨友同埋民建聯副主席張國鈞，轉達畀該黨漁農界議員何俊賢，睇吓可唔可以聯絡艇家出海救人。佢話，大難當前，最重要係救人，唔係鬧梁振英同中聯辦，而係及時回應社會重大議題，以表哀悼咁話。


張國鈞就話全日都無收過民主黨電話，無論如何，佢話民建聯一定會幫手協助家屬同處理保險，今早民建聯社會行動委員會開會，傾吓點樣可以協助。


工黨醫院探傷者 促各黨棄歧見

工黨張超雄同何秀蘭就去咗瑪麗醫院探傷者，佢哋希望市民以至各政黨傳媒都放下歧見，為死難者家屬提供支持協助。