中新社稱「中國船救95人」捱轟

【明報專訊】南丫島撞船意外發生後，廣東省政府即刻派咗4艘打撈船協助救援，但只係待命，毋須做嘢。不過，有眼利網民發現，中新社噚日下晝3點出咗一段新聞報道，話從中國海上搜救中心得悉，「中國專業救助船舶在香港撞船事故現場已成功救起95人」，唔少網民就質疑香港傷者係咪「被救起」。


梁振英（CY）噚日晏晝4點幾喺記者會講，內地打撈船噚日清晨來到事發現場，只係候命，最終無參與救援，仲已經駛返去內地。中新社嘅新聞稿話，「交通運輸部高層立即親臨中國海上搜救中心指導搜救」，有網民質疑點解唔係CY指揮，仲要求中新社立即更正道歉，網上吵吵鬧鬧。


政府公布周四即聽日舉行全城悼念，網民又問，點解唔喺今日搞云云，質疑係遷就國慶活動。查實內地國慶係慶祝成個禮拜，今日或明日，真係唔知有咩分別。