「港人不能遺忘的傷口」

【明報專訊】國慶日發生撞船慘劇，有網民事後孔明質疑政府，話撞船喺晚上8點23分發生，點解政府唔索性取消國慶煙花咁話。特首梁振英噚日開記者會時話，「應否取消煙花匯演，應該由主辦單位回答」。不過，有網民發現煙花嘅主辦單位正正係民政事務局，話諗極都唔明，點解特首唔肯答呢個問題。


初報兩人傷 未掌握情况

慘劇發生後，有網民批評政府遲通知傳媒，但睇番政府前晚就撞船事件發嘅消息，第一條係消防處喺8點34分發出，警方則喺8點56分發稿，兩篇稿都係喺煙花開始前，所以都好難話政府刻意隱瞞事件。不過，政府嘅新聞通報當時話，撞船中只有兩人受傷，相信都未係好掌握情况。


有官場中人同Emily講，相信事件發生都好突然，起初大家都唔知咁嚴重，可能到咗知道事件時，已經要放煙花。當時維港兩岸有31萬人，如果貿然停放或中斷，會唔會因為資訊混亂引起恐慌或揣測，都要考慮後果。梁振英就肯定喺放煙花時已知事件，因為一放完煙花，佢即刻出來同記者講，政府即時啟動緊急事故小組處理。


王國興：未有真相 無必要暫停

撞船事件令全城關注，有網民就喺facebook發起專頁，話以後10月1日將成為「香港人不能遺忘的傷口」，香港人「需要的是悼念」，不是「偽裝歌舞昇平的煙花」，呼籲以後國慶唔好再放煙花慶祝。有網民留言話，以後國慶都會想起呢次海難，相信以後都好難慶祝，提出不如明年10月1日不要放煙花，改為悼念死難者。


不過，立法會議員王國興唔贊成下年唔放煙花，因為事件仲未調查，「係咪唔放煙花就唔會出事亦未知」，喺未搵到真相前，無必要「斬腳趾避沙蟲」咁話。