梁家傑曾鈺成周一舌戰

【明報專訊】新一屆立法會下周三正式開鑼，首要任務當然係選出大會主席一職，雖然泛民仲未協調好未來4年嘅分工，但佢哋噚日開完飯盒會後，至少拍板派出公民黨梁家傑參選立法會主席，挑戰坐定粒六嘅民建聯曾鈺成。泛民喺立法會只有27票，梁家傑基本上輸梗，但至少可以要曾鈺成喺下周一坐低就主席選舉辯論。


要就曾「剪布」算帳

雖然已經知道係無可能贏嘅仗，但泛民認為一定要搵個平台，就「剪布」一事向曾鈺成算帳，有成員仲笑言，只要喺建制派度撬到一票就當自己贏。不過，泛民又唔係冇機會主持大會嘅，事關喺周三嘅首場立法會大會上，未正式開會前，會由資歷最深厚嘅議員主持選主席環節，而呢個人就係由1995年起已做議員嘅民主黨何俊仁。


何俊仁主持選主席環節

泛民噚日亦團結一致地支持公民黨「新丁」郭榮鏗競逐司法及法律事務委員會主席，希望泛民呢個橋頭堡唔好落喺爭議多多嘅梁美芬手上。內會副主席方面，建制派話可以讓畀泛民做，但大前提係個位要係建制派都可以接受嘅人選。工黨何秀蘭、公民黨湯家驊同衛生服務界李國麟都表明有意競逐，聽聞建制派較為接受相對中立嘅李國麟。


據了解，立法會18個事務委員會之中，泛民有機會喺當中嘅10個輪流做主席，意味有8個委員會係由建制派包辦做足4年，當中包括最受爭議嘅保安事務委員會。